கோவை: கோவை ரயில் நிலையத்தின் பின்புறம் குட்செட் சாலையில் உள்ள சாக்கடை கால்வாயில் சுமார் 40 வயது மதிக்கத்தக்க அடையாளம் தெரியாத ஆண் சடலம் மீட்கப்பட்ட சம்பவம் பரபரப்பை ஏற்படுத்தியுள்ளது.
கோவை ரயில் நிலையம் பின்புறம் உள்ள குட்செட் சாலை பகுதியில் இன்று பொதுமக்கள் வழக்கம்போல் சென்று கொண்டிருந்தனர். அப்போது, அங்குள்ள சாக்கடை கால்வாயில் ஆண் ஒருவர் சடலமாக கிடப்பதை பார்த்த சிலர் அதிர்ச்சியடைந்தனர். இதுகுறித்து உடனடியாக போலீசாருக்கு தகவல் தெரிவிக்கப்பட்டது.
தகவலறிந்து போலீசார் மற்றும் தீயணைப்பு மற்றும் மீட்புப் பணியினர் சம்பவ இடத்திற்கு விரைந்து வந்தனர். தொடர்ந்து, சாக்கடை கால்வாயில் கிடந்த ஆண் சடலத்தை மீட்டு, உடற்கூறாய்வுக்காக கோவை அரசு மருத்துவக் கல்லூரி மருத்துவமனைக்கு அனுப்பி வைத்தனர்.
Also Read: ஈச்சனாரியில் பூட்டிய வீட்டில் கொள்ளை.. சிசிடிவி காட்சிகளை ஆய்வு செய்யும் போலீசார்!
சடலமாக மீட்கப்பட்ட நபருக்கு சுமார் 40 வயது இருக்கலாம் என கூறப்படுகிறது. அவரது பெயர், முகவரி உள்ளிட்ட எந்த விவரமும் உடனடியாக தெரியவில்லை. அவர் கோவையை சேர்ந்தவரா அல்லது வேறு பகுதியில் இருந்து வந்தவரா என்பது குறித்தும் போலீசார் விசாரணை நடத்தி வருகின்றனர்.
இதற்கிடையே, அந்த நபர் போதையில் இருந்தபோது அல்லது கவனக்குறைவால் சாக்கடை கால்வாயில் தவறி விழுந்து உயிரிழந்தாரா என்ற கோணத்திலும் விசாரணை நடைபெற்று வருகிறது. அதேசமயம், வேறு ஏதேனும் காரணத்தால் அவர் உயிரிழந்து சடலம் கால்வாயில் வீசப்பட்டதா என்ற கோணத்தையும் போலீசார் விசாரித்து வருகின்றனர்.
இதுகுறித்து பந்தய சாலை போலீசார் வழக்குப்பதிவு செய்து, உயிரிழந்த நபர் யார் என்பது குறித்து விசாரணையை தீவிரப்படுத்தியுள்ளனர்.
Also Read: கோவை தடாகத்தில் மாட்டை தாக்க முயன்ற காட்டு யானை… சிசிடிவி காட்சிகள் வெளியீடு!
மேலும், சம்பவம் நடைபெற்ற குட்செட் சாலை மற்றும் சுற்றுவட்டார பகுதிகளில் பொருத்தப்பட்டுள்ள கண்காணிப்பு கேமராக்களின் காட்சிகளையும் போலீசார் ஆய்வு செய்து வருகின்றனர். சடலம் கிடந்த இடத்திற்கு அந்த நபர் எப்போது வந்தார், அவருடன் வேறு யாரேனும் இருந்தார்களா என்பது உள்ளிட்ட விவரங்களை CCTV காட்சிகள் மூலம் கண்டறியும் பணியும் நடைபெற்று வருகிறது.
மக்கள் நடமாட்டம் அதிகம் உள்ள கோவை ரயில் நிலையத்தின் பின்புற பகுதியில் சாக்கடை கால்வாயில் ஆண் சடலம் மீட்கப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது. உயிரிழப்புக்கான உண்மையான காரணம் உடற்கூறாய்வு முடிவுகள் மற்றும் போலீசாரின் விசாரணைக்கு பின்னரே தெரியவரும்.
